წალენჯიხის მუნიციპალიტეტის მერია მოსახლეობას მიმართავს

• წალენჯიხის მუნიციპალიტეტის მერია მოსახლეობას მიმართავს:

“წალენჯიხის მუნიციპალიტეტში, მიმდინარე საგაზაფხულო/საველე სამუშაოების პარალელურად, გაზრდილია ხანძრების გაჩენისა და გავრცელების რისკები, რომელიც საფრთხეს უქმნის თითოეულ მოქალაქეს, კერძო თუ სახელმწიფო საკუთრებაში არსებულ აგრარულ მეურნეობას, ასევე ტყის მასივებს.

წალენჯიხის მუნიციპალიტეტში ერთდროულად რამდენიმე შემთხვევა უკვე დაფიქსირდა. ამ წუთებში ხანძარია სოფელ ეწერში, ადგილზე გამოძახებულია სახანძრო ჯგუფი.

მოსახლეობისთვის კარგადაა ცნობილი, რომ მიუხედავად სახანძრო სამსახურის დაუღალავი და თავდაუზოგავი შრომისა, ხშირ შემთხვევაში, ხანძრის სიძლიერის, მასშტაბურობის და რელიეფის გამო ვერ ხერხდება ხანძრის დროული ლოკალიზება და ლიკვიდაცია. შედეგად ნადგურდება ტყეები და კერძო საკუთრებაში არსებული ხეხილისა და სხვა კულტურების ბაღები. ამას გარდა საფრთხე ექმნება დასახლებულ პუნქტებს. გთხოვთ, გამოიჩინოთ მეტი სიფრთხილე და პასუხისმგებლობა. ნუ დაანთებთ მასშტაბურ ცეცხლს და ნუ დატოვებთ მას უმეთვალყურეოდ. ბოლო დღეებში არსებული თბილი, მშრალი და ქარიანი ამინდების გათვალისწინებით, ნუ გადააგდებთ ანთებულ თამბაქოს ან სხვა ნივთს, რომელმაც შესაძლოა აალება გამოიწვიოს. ასევე, შეგახსენებთ, რომ აღნიშნული საკითხი რეგულირდება საქართველოს კანონმდებლობით. მუხლი 35. მუნიციპალური არასახიფათო ნარჩენების ღია წესით ან არადანიშნულების საწვავ დანადგარებში დაწვა.

მუნიციპალური არასახიფათო ნარჩენების (ფოთლების, ბაღის/პარკის ნარჩენების, საყოფაცხოვრებო ნარჩენების) ღია წესით ან არადანიშნულების საწვავად დაწვა – გამოიწვევს დაჯარიმებას 500 ლარის ოდენობით.

მუნიციპალური არასახიფათო ნარჩენების (გარდა ამ მუხლის პირველი ნაწილით გათვალისწინებული ნარჩენებისა) ( მათ შორის, საბურავის, რეზინისა და სხვა ელასტომერული მასალის) ღია წესით ან არადანიშნულების საწვავ დანადგარში დაწვა – გამოიწვევს დაჯარიმებას 1500 ლარის ოდენობით.”-აღნიშნულია ინფორმაციაში.